Kitab, atau sebenernya, lebih tepatnya sih ebook tentang SEO. Namun, berhubung ebook ini judulnye adalah SEO Bible, jadi ane mengartikannye sebagai kitab SEO, berlebihan kaga ya? Ga tahu dah. Ane sempet panasaran juge, koq berani-beraninye ye, tuh penulis memberikan gelar Bible kepade bukunye.

Biasanye nih, dari beberape buku nyang berhasil ane dapetin, nyang judulnye juge pake kata bible diujungnye, tuh buku biasanye emang ditujukan sebagai bahan referensi, atau pegangan, atawa pedoman untuk topik yang menjadi pilihannye. Contohnye ane pernah dapet buku yang judulnye Photoshop 6 Bible.

Dan pas ane liat isinye, ternyata tuh buku emang lengkap banget isinye. Pegimane kaga lengkap, halamannye aje ampe 1000-an lebih, dan tuh buku ternyate best seller lagi. Kaga kebayang dah, seberape girangnye ane waktu ntu.

Nah.. gare-gare Photoshop 6 Bible ini juge, ane jadi rada keranjingan hunting buku-buku nyang ade kata bible di ujungnye. Sebab biasanye, para penerbit ntu menggunakan kata-kata tertentu buat nunjukkin bahwa buku tersebut adalah buku yang diterbitkan olehnya, dan diformat dengan care yang same.

Contohnye? Ane yakin ente-ente pasti pernah mendengar judul buku yang ujungnye ade judul For Dummies. Misalnye Internet Gigabook For Dummies, atau Laptops For Dummies, atau Linux For Dummies, dan banyak lagi For Dummies lainnye. Nah... buku-buku ini, sekalipun ditulis oleh berbagai pengarang berbeda, namun diterbitkan oleh satu penerbit, yaitu Wiley Publishing, Inc. Dan kata For Dummies, sudah menjadi Hak Paten dari sipenerbit.

Kembali ke Kitab SEO atau SEO Bible tadi, nih buku ternyate diterbitin oleh penerbit nyang kaga same dengan nyang nerbitin Photoshop 6 Bible. Jika Photoshop 6 Bible ntu ternyate diterbitin oleh IDG Books Worldwide, Inc. Maka, SEO Bible ini ternyate di terbitin oleh Wiley Publishing, Inc. Koq beda ye?

Tadinye ane sempet kecewa juge, tapi ternyate kekecewaan ane ntu sebenernye kaga berasalan, sebab sudah terbukti, bahwasanye buku-buku terbitan dari Wiley Publishing, Inc ntu kualitasnye kaga bisa di remehin. Begitu juge dengan SOE bible ini, ane rase nih buku kaga bisa dipandang sebelah mate. Terutame buat mereka nyang masih suka kaga nyambung kalo diajak ngobrol soal SEO, contohnye ane.

Hunting buku-buku di internet ntu emang suatu hobbi nyang mengasikkan. Ane berharap, suatu hari nanti ane bisa ngasilin sesuatu dari hobby nyang sepertinye masih rada aneh ini. Ngumpul-ngumpulin ebook kate orang sebenernye emang ade manfaatnye, cuman ane rase tuh ebook kaga bakalan banyak manfaatnye kalo cuman dikumpulin aje, alias kaga dibaca atawa di pelajarin isinye.

Nah.. sodare-sodare, sebagai salah satu pelopor dan penyemangat orang agar mao belajar, dan sebagai orang nyang telah berani-beraninye ngomporin orang agar mao tetap semangat belajar, yaitu salah satunye dengan care menuliskan ape nyang telah dipelajarinye, biar kaga mudah lupe. Maka ane punya niat kepingin menuliskan kembali ape yang bisa ane mengerti dari ebook ini, tentu saje dengan versi dan bahasa ane sendiri.

Ane berniat menceritakan kembali ape nyang bisa ane mengerti dari buku ini, dan menjadikannye sebagai postingan di blog ini. Kan enak tuh, ane jadi kaga repot-repot dan pusing-pusing lagi mikirin kemane, dimane, dan ape nyang harus ane postingin di blog ini. Ane melakukan ini semate-mate demi ketenaran dan kepopuleran yang ane idam-idamkan.... eh... salah... ma'af keceplosan...

Maksud ane... ane melakukan ini biar kite bise same-same belajar dan saling membantu, serta bekerje same dalam rangke mewujudkan ape yang kite idam-idamkan bersame. Yaitu menuju terwujudnya masyarakat yang adil dan makmur. Masyarakat yang madani, hayati, ragawi, demokrasi, tehnorati, dan supremasi.... kaga nyambung neh.

Kalo ternyate diantare sodare-sodare ade nyang punye pikiran dan niat nyang rada-rada mirip dengan ane, maka ane dengan senang hati untuk menerimanye. Tapi kalo Ternate dan Tidore... ntu adalah name-name pulau. Nah... ane akan coba dan berusaha membuat postingan tentang isi dari buku ini secara berurutan. Mulai dari Bab paling awal ampe Bab nyang paling akhir.

Karena ntu, kalo sodare-sodare kepingin kaga ketinggalan satu eposode pun, ane sangat menyarankan agar sudilah kiranye ente-ente mau jadi pelanggan tetep postingan blog ane ini. Caranye? Cukup mudah koq, Ketik REG spasi Nama Pacar ente spasi nomor teleponnye, terus simpen aje di memori telepon ente, kaga usah dikirim kemane-mane... hehehe.... kaga lucu ye?

Nah... kalo nyang ini serius, ane cuma nyaranin ente untuk menjadi pelanggan setia ane dengan cara mengklik link ini, atau mengklik gambar ini dibawah ini:

Atau bisa juga dengan cara ente masukkin alamat email ente kedalam kotak nyang telah ane sedia'in di sebelah. Terus klik tombolnye, setelah ntu buka email ente, cari email nyang di kirim oleh FeedBurner, terus buka.

Didalam email ntu nanti ade link nyang harus ente klik, link itu sebagai tande untuk mengkonfirmasikan bahwa emang bener ente sendirilah sebagai pemilik sah email tersebut, dan ente emang serius ingin berlangganan. Sodare-sodare kaga usah khawatir dah, kaga bayar koq, gratis, kaga dipungut satu sen pun, sumpe de. Nah... sodare-sodare... sampe ketemu di postingan berikutnye, wasalam, enjoy aje.