Eh.. mpok, pernah ngedenger tentang eBay kaga? Pernah nyobai'inye kaga? Pernah nyoba jualan disono kaga? Pernah nyoba beli barang disono kaga? Pernaaaah... kaga?

Kagaaaaa..... Emangnye kenape sih bang? Koq pake nanya-nanya soal eBay sagala raja guguk?

Eng.. anu mpok, aye cuman anu aje... eh maksud aye, aye cuman kepengen tau tentang eBay aje.

Emang ade ape di eBay ntu bang?

Kate orang sih, eBay ntu adalah situs lelang terbesar di dunia mpok. Lha, kalo situs bisnis yang terbesar aje kite sampe kaga tau, pan rugi banget kite-nya. Ape lagi buat kite yang sedang semangat-semangat-nye buat belajar bisnis di internet.

Iye ye bang. Malu juga ye, ngaku-ngaku ingin belajar bisnis di internet, tapi situs-situs bisnis yang gedean aje kite sampe kaga tau. Lha, trus, pegimane bang?

Ntu die mpok, yang jadi penyebab aye jadi punya niat kepengen tau lebih banyak tentang eBay. Sebab aye sering denger, katenye banyak juga orang Indonesia yang telah sukses berbisnis di eBay. Nah, siape tau aje kite bisa ikut-ikutan nebeng dan sukses, betul kaga mpok?

Betul tuh bang. Pikiran sesat ntu juga pernah terlintas di benak aye. Malah, aye pernah iseng-iseng menyelidiki dan mencari-cari informasi mengenai eBay ini. Tapi, betape kecewanya aye, saat mengetahui kalo ternyate eBay ntu belon mendukung orang Indonesia sepenuhnye, alias masih setengah-setengah aje.

Betul mpok, aye juga sempet merase putus ase, dan merane setengah dewa. Sebab, sewaktu aye coba-coba melihat situs utamanye eBay, aye cari-cari di setiap linknye, kali aje ade link yang merujuk ke situs cabang eBay di Indonesia.

Eh, ternyate kaga ade mpok. Yang ade cabang eBay-nye, cuman negara-negara yang aye sebutin dibawah ini nih mpok, coba perati'in mpok:

Tuh liat mpok, Malaysie, Kereye, Hongkong, Taiwan, dan Thailand aje udah punya cabang eBay, masak Indonesia yang katenye macan Asia, koq masih kaga punya cabang eBay? Tanye kenape? Ape karena orang Indonesia kaga doyan belanje kali ye? Ato karena duitnye cuman cukup buat beli beras aje?

Iye kali bang. Kayaknye, pasar di Indonesia ntu masih dipandang sebelah mate. Care memandangnye pun, hanya sekejab saje. Kasian ye kite-kite pade. Kapan ye, kite bisa makmur seperti para tetangge kite, yang katenye negerinye lebih kecil, rakyatnye lebih sedikit, dan hasil buminye pun kaga ade? Kapaaaa.... n?

Lha trus pegimane bang? Ape kite cuman bisa bermimpi aje? Ape kite cuman bisa berharap dan berangan-angan aje? Ape kite harus menerima nasib dan sekedar bisa beli beras aje?

Waduh, aye juga kaga tau tuh mpok. Aye kaga berani janji ape-ape. Aye cuman bisa berharap, suatu hari nanti peluang ntu akan datang dan terbuka lebar. Dan sambil menunggu saat itu datang, menurut aye, kaga ade salahnye kalo kite siap-siap dari sekarang. Betul kaga mpok?

Betul tuh bang! Tapi, bersiap pegimane maksudnye bang?

Maksud aye begini mpok, sambil kite nunggu si eBay mulai menjelajahi dan bahkan mungkin merajai pasar lelang di Indonesia, kite bisa mempersiapkan diri dulu dengan cara mempelajari ape sebenernya eBay ntu. Kite bisa mempersiapkan diri, dengan cara mempelajari semua hal yang berhubungan dengan si eBay tadi mpok.

Misalnye, kite bisa mempelajari mengenai bagaimana cara mendaftar di eBay. Atau mengenai bagaimana cara menjual dan membeli barang di eBay. Ape aje syarat-syarat yang dibutuhkan. Ape kiat-kiat, trik-triknye. Bagaimana tentang jaminan keamanan dan kenyamanan, serta pelindungan terhadap konsumennye. Gitu lho mpok!

Betul juga ye bang. Sepertinye mempelajari eBay ini adalah kegiatan yang cukup menarik juga. Dari pade kite pusing-pusing dan ribut-ribut mikirin beras, mendingan kite mempelajari eBay aje. Siape tau pengetahuan yang kite dapet ntu, bakal membantu kite di kehidupan berikutnye. Siape tau duit kite bukan cuman cukup buat beli beras aje.

Betul tuh mpok. Nah, kalo mpok sudah mulai terpengaruh dan berminat untuk ikut-ikutan belajar eBay, nyok same-same kite belajar eBay-nye lewat blog aye ini aje. Tapi mpok, aye belajar eBay-nye cuman bisa lewat eBook aje. Maklom mpok.... kurang modal, lemah mental, dan tukang ngayal, amin.

Tapi menurut aye mpok, kaga ade salahnye juga kalo kite belajar eBay-nye lewat ebook dulu. Siape tau aje nanti kite punya cukup modal buat belajar dari orang yang bener-bener ahli dalam bidang eBay ini, betul kaga mpok? Betulin aje dah mpok, kaga bayar ini!

Apa itu eBay dan Bagaimana Cara Kerjanya?

Nah mpok, sebelum kite cerite yang kaga karuan mengenai eBay, ade baeknye jika lebih dulu kite meluruskan pemahaman kite mengenai eBay. Mpok mungkin masih merase penasaran, ape eBay ntu sebenernye? Dan pegimane orang bisa dapet duit dari sane?

Menurut penulis eBook tentang eBay, yang sedang aye baca ini mpok, kite bisa ngebayangin eBay seperti sebuah pesta yang besar dan meriah. Kenape disebut pesta mpok? Sebab kite bukan cuman bisa menjual atau membeli barang di eBay. Tapi kite juga bisa manfaatin eBay buat bertemu dan bergaul dengan orang-orang.

eBay, bisa kite manfaatin untuk mencari dan bertemu dengan orang-orang yang mempunyai ketertarikan yang sama. Atau kite juga bisa memanfaatkannye untuk mencari orang-orang yang mempunyai profesi yang same, bisnis yang same, mimpi yang same, keinginan yang same, dan segalam macam yang ade kesamaannye dengan kite-kite pade.

Dan yang lebih menyenangkan lagi nih mpok, di pesta eBay ntu kite bukan cuman bisa membeli, tapi kite juga bisa berjualan. Di eBay, kite bisa mencari dan membeli barang yang kite pengenin. Lalu, menjualnye lagi dengan harga yang lebih mahal. Nah, ape kaga enak tuh mpok?

Mpok mungkin selama ini mengira bahwa barang-barang yang dijual di eBay ntu semuanye adalah milik yang punya situs eBay. Kaga mpok, mpok salah. Mpok akan tersesat kalo punya pemikiran seperti ntu. Semua barang yang ade di eBay ntu adalah milik anggota-nye.

eBay kaga menjual barang apepun. Die cuman sebagai penyedia tempat. Dan para anggota lah yang melakukan transaksi jual beli dengan sesamenye. eBay cuman menerima fee dari anggotanye aje. Berape dan bagaimane cara kite membayar fee ntu?

Nanti akan kite cari tau. Jadi, jangan kemane-mane ye mpok! Mantep aje disini! Tungguin kelanjutan kisahnye! Hanya disini! Satu-satunye tempat belajar internet yang paling menyenangkan. Iiihh... ge'er amat!